كان يا مكان زمان زمان وبالتحديد فى زمن الأسرة الرابعة من تاريخ مصر القديم بنا الملك جدف رع ابن الملك خوفو هرم هنا فى ابو رواش , حكم مصر بعد ابوة الملك خوفو وراح مشى من الجيزة لحد ما جه هنا فى ابو رواش وهو تالت ملوك الاسرة الرابعة
الحكاية مليانة بالغموض والروايات كتير عن الهرم المفقود هرم جدف رع وليه ساب الجيزة وجه هنا فى ابورواش يبنى هرمه ؟
هو طبعا مش غريب ولا حاجة ان يختار ابورواش علشان فى الفترة الزمنية دية كانت العاصمة مدينة منف العريقة اللى بتمتد من البر الغربى ودية كانت اماكن دفن ملوك تلك الفترة فى جبانة منف اللى بتمتد اكتر من تلاتين كيلو متر من أبو رواش شمالا حتى هرم ميدوم فى الجنوب , على فكرة هرم ميدوم يبقى جد الملك جدف رع
اختلف الأثريون عن تحديد سبب تدميره ونشأت عدة نظريات ان سبب التدمير هرم جدف رع انه لم يكن محبوبا من شعبه والبعض يرى أنه تهدم بعد غزو الامبراطور اغسطس لمصر
واستخدم حجارة الهرم فى بناء بعض المشاريع وفى عصر محمد على باشا تم استعمال هذه المنطقة كمحاجر لاستخراج الصخور والأحجار وكان هرم جدف رع من المصادر الرئيسية للحجارة ووصل معدل سحب الأحجار من الهرم حوالى 300 حمولة كانت الجمال بتشيلهم فى اليوم الواحد
فى النهاية مازال التنقيب متواصل في محيط الهرم المكتشف أملا في العثور على كتابات داخل الهرم المفقود هرم جدف رع وكل ما قيل عن الهرم المفقود هى مجرد افتراضات ولا يوجد صحة لهذة الافتراضات والادعات وكالعادة يبقى سر المصريين القدماء لغز يحير العلماء والعالم
ولسة الحكاية ما خلصتش
شكرا مع السلامة
